Ticktock

Friday, December 3, 2010

U-Ama



Kan naupan lai khan sana leh calendar khan awmzia a nei tam lo khawp a, kum tawp exam a zawh kha chuan U-Ama a hnai tih erawh kan hre thung. Khua a rawn vawt tan a, hmui a ro a, kan chat a, pawnto tur pawn inthuam lum that a ngai tawh si, nute puan tha kan la chhuak ru fo mai. An hriatchhuah erawh chuan hmabak a ko thin khawp mai. Thlasik rim a nam an ti thin a, naupang kha chuan a rim lam kan ngaihtuah ve vak lo niang. Amaherawh chu U-Ama a hnai tih erawh kan hre chiang khawp mai. Thiante nen kan thawmhnaw lei hual te, kan tho-kep silai duh zawng te, halpuah leh rocket te sawiin 'in sawitheih siak competition' kan nei a ni ber. Mahni duhzawng lei tak erawh a awm ka hre tlem khawp, nu leh pa thu thu a ni vek.

"Chumi..... te inah Krismas hman dan relin an thukhawm. Masi sial tur Sialsuk a mi an kai dawn. Pi........ vawkpa khu an lei bawk dawn" tih te kha hriat nuam kan tih zawng a ni thin. Puitling tam tak ai khan news hi kan up-to-date thin awm e. Inhnuai atanga lo ngaithla tawk kha an awm thin miau a. Se kaihna-a kal kan chak ve theih zia kha aw! "Se sa chu ka ei peih lo, bawng sa ni zawk se" tihte kha 'discussion' kan lo nei ve thin a, kan thu erawh a tlang lem lo. Biak Inah kohhran ziaktu lianin U-Ama program an puan chiah hi chuan Biak Ina naupang ninhlei thin pawh hi kan ngawi thap zel. Kan chanpual ve 'hnah put' an puan lai phei hi chuan mahni concern a ni bawk a, kan ngaithla uluk thei khawp a. Hnah pu thei dinhmuna kan han din hi chuan pawimawh hi kan inti thin khawp mai. Hnah tel lovin ruai a theh theih loh tih kan hre chiang em! Tun lai angin kohhran leh khawtlangin kan indaih thleng nei hek lo. Kan upat hnu deuhah 'mau thei' in-charge kan la ni dawn chauh. Kan pawimawh chho zel. 'Disposable cup' tihte chu khang hun lai khan thing kan ti tlat. Kan naupan zual lai deuh kha chuan Masi sial/bawng thlah kha kan in chuh thin!

* he thu tawi hi kum 2007 christmas dawna ka ziah, ka chhunzawm peih tak loh ang ang khan dah ve leh tawp.

6 comments:

khumchikthei said...

U-A-Ma hi chu a nuam em a sin. Sialsa rum tak erawh ei tam a har khawp mai. Tunlai hi chuan bawngsa tuihnai taka siam kan thiam ta a a zia tawh khawp mai. Tunhma lama sialsa chhum tawr han ei mai kha chu! A hun in a zir em a kan lo lem ral ve mai mai thin chu a ni mahna.

Krismas chibai.

...khrum

Maisek said...

I ziak ngaihnawm thiam khawp mai! hnah chungah ngei ruai han theh kha chu dangdai ve tlat! hnah lakna a tel kha kan chak ve thei rap mai mawle! tet lai kha chuan u-ama kha thil nghahhlelhawm ber te zinga mi ani tlat! Tunah erawh ruai theh dan a dang ta! Merry Christmas!

caribou said...

I ziak ngaihnawm khawp mai. Kan khua chu a inang lo na'ng a, kan naupan laia krismas kan dawnsawn dan a inang khawp mai. Changel hnah ngeia ruaitheh kha a lo nuam ber mai. Lungranga kan awm laiin krismas chhangruai theh man leh sa-ruai theh laia satui sem nan mauthei kan hmang thin. Changel hnah leh mauthei te kha disposable an nih bakah biodegqadable an ni a, a eco-friendly khawp mai.

digimalt said...

I hmel lan ang i ni tawp lo mai sir...

krista said...

E..he thu ziak hi a tha tuk. Ka naupan lai hun min ti hre chhuak e. Zokhua chhuak ka ni hi chu ka lawm hliah hlaih thin. Tha hle mai a.

Rka said...

ekhai, u-ama lawm chhungin in lo tlawh sap sap hlawm a ni maw... in lo chhiar peih chu ka lawmthu e.

khumchikthei, sialsa hi mizovin kan sawi dan chuan sesa a ni daih em?

Maisek: hnahchungah ngei hian theh leh ila, changkang deuh hlek leh thianghlim deuhvin a tih theih ngei ang, tourist ho a hip ang tih tu emaw sawi ka hre tawh.

caribou: Kan naupan lai khan Krismas kha khua-a awm thei deuh leh in nei lian deuh khan an thleng a, riah te pawh an riah chilh thin kha mawle

sir digi hi min ti nui