Hlim Zan

Hlim zan
Khawilam chhingkual emaw kan intawn

Sakhming hmelhriat ngai loh zanin chu

Lungrual te a zai vawr dial dial in

Tlai khawvar hial kan lo huam tak le

Ningzu dawn chhuihthangval lenthiama

Perhkhuang tingtang leh chawmkhuang remin

A lam diai e selrun laichhuatah

Muvanlai tlang hrutin phar der der

Min hlan bik ang maw in no ropui

Ka phu lo kei zawng khua lianan

Min fan chhuahtir e pipu nun hluiMi hrang no chawi iang ka hawi lur e
Hrui ang zawt nang che i hming leh khua

Lampui changah tawn ni her le'ng a

Chutin kan chen zanin ngaih thute

Kan la hril leh dawn nia khuareia'n

He hla hi Zirsangzela Hnamte-in an thianpa Hmingthanzama, Table Tennis Cup
lâk an lawmnaah chawp leh chilh taka a phuah a ni. He hla tawite hian chumi
zana an hlim dan chu a phawk chhuak viau awm e. Chawp leh chilh a hla phuah
thiam hian mi bik a nihzia chu a pholang awm e. Amah ngeiin “Hmanlai mite
anga chawp leh chilha thil thleng leh hmuh, a hmun la laa phuah nghâl mai hi
chu thil khirh tak niin ka hria. Hetiang hla phuah hi pahnih khat chu ka nei
ve a, a thuah chuan engmah harsatna a awm lem lova; mahse a thlûk bawk hi a
ni,” tiin a sawi nghe nghe.

Ramhluna Hnamte chuan heti hian a sawi “Saji (Zirsangzela) hi artist dik tak a ni, guitar tuk a thiam a, platform shoe a tuk thiam bawk a, painting a thiam em em a, fabric painting thlengin a thiam hle. Kan T-shirt ah te hian khang hun laia rock star, kan idol ve em em ho thla kha min paint sak thin a, kan chhuang thei a sin,” tiin.
Thurawnna: "Zirsangzela leh a hlate" by R.L. Thanmawia

He hla hi nalh ka tih em vang leh Pu Zirsangzela Hnamte hi ka ngaisang em vang a ni.