Ticktock

Monday, November 24, 2008

Chiahpuam: Ka hriat leh thil hmuhte

An sawi, an ziak, keipawn ka vei thin khawp mai. Mut mawh hnar mawhah em chuan ka nei lo. A bulpui deuh hre tur hian mi hi ka zawt kual thin. Dah ve tum ni awm takin ka insawi a, mahse a pung sang ka zawng der vel a, a bupuiah chuan a sang dawn tih ka hre reng. Ka hmelhriatte'n 12% - 28% thlengte in an dah a, an dahnate pawh min hrilh ve thin. Mahse beidang duh lovin ka zawng zel a, 40% a dahna tur ka hmu ta a. Chupa chu kan zawt kan zawt kual a, kan chhimbudawi kual ta vel a. A chungah lawryer leh bank manager an awm thu a sawi ta a. Ka lawm ru ang reng. Thla tharah ka dahna atangin ka la chhuak ang a, ka rawn dah ve ang tiin kan inthen a. Ka rilru te te chuan ka hriat belh zel dawn e ka tia. Mahse a kar leh lawkah chuan chanchinbuah a rawn lang ta chuai chuai mai a, ka hai chhuah ngai lovin anmahni leh anmahni an lo in puang reng a lo nia

Midang chu ka hre lo va, H. Zomuanthanga Zonet palaiin an kawm zan khan Zomuanthanga khan dan phal lova thil ti a nih thu chiang takin a sawi a, a sumdawnna pawh a thuruk a nih thu a sawi a. He thil hi Police tan manna tura evidence tha tawk a ni dawn lawm ni?

Thlemna hi a tu a te pawh hian kan tawk a, a do zo hi chu tlemte kan ni thin. Kei ngei pawh ka tawk zing ve khawp mai. Chung zingah chuan Chiahpuam hi pakhat chu a ni. Min sawmtu an tam, min sawi hmuhtu an tam. A tu a te pawhin a hlawkzia hlir an sawi lehnghal. Nimahsela, hei hi ka rilruah a awm - "Piangthar tha tak tia sawi tur chu ka ni lo, mahse Kristian ka ni a, chumi avang tak chuan ka dah lo vang"

Bible kan keu a, hre bel viau chu ka ni hauh lo, Thufingte-ah a awm ngei ka ring a. Hengte hi ka hmuh ka duh lai kan thurchhuahte chu a ni:

1. Engmah lo mai mai a sum dehchhuah chu tihriral a ni ang a; Thawhrimna a khawl erawh chu a pung ang. Thuf 13:11
2. Mi fir chuan sum a um a, a chungah tlakchhamna a lo thleng dawn tih a hre hek lo. Thuf 28:22
3. Sum hi a tirah dehchhuah thuai theih mahsela, a tawpah malsawmna a ni kher lo ang. Thuf 20:21

Chiahpuam atanga sum hmuhte hi engmah lo mai mai a sum dehchhuah a ni a, riral tawk a awm dawn. Mi fir ni vek kher lo mahsela tlakchhamna chi khat chu an chungah a thleng ngei ang. A tirah a hlawk viau a, awm mai mai paha sum dechhuah a ni. Malsawmna an dawng zui em tih erawh Pathian thu thu.

Chiahpuamah hian insuarance emaw security emaw engmah an dahnate hian an pe lo. Chu chu a dahtute pawh hian an hria. Mahse an dah lui a, an chan a. 'E ka risk a ka risk fuh ta lo ve' ti ta mai lovin Police station kawtah 'hmeh let loh chuan pawi zawk ang' tite in an au rual leh ang dual dual a. Loan la rul tha thei lo hian sorkarin min rulh sak rawh se rulh loh chuan pawi zawk ang tiin au se thuhmun reng. Sumdawng thenkhatin an sum dawnnaah lost ta se, sorkarah sum hmuh letnan tanpuina phut ta tlat se awm kan ti vak bikin ka ring lo. Kei pawh mihring pangngai emaw ka tih pawisa ka puk tir a, tun thlengin min la rul lo, sorkarah ka vui vai lem lo.

Kan u pakhat hian a dah ve a, affidavit-ah chuan 'chumi khami pawisa chu SBI-ah dan pun turin....' an ti ve thlap. SBI ho hian hre tak maw. Kan u pawh chu ka nuih nghek nghek a, amah lah chuan 'ka van mawl tak' a ti vel mai mai a, a nuihza berah a la tang zui. Neih chuangliam ni lo, mahni neih chhun ngawih ngawih dahte hi an khawngaihthlak tak zet a ni.

Kan office ami thenkhat phei chu loan-te lain an dah a, a dah zat hu la chhuak an awm hmel si lova. An ngaihtuahawm hlawm ngawt mai.

A tawp berah chuan Mizo mipuite hian in enlet kan ngai a, Lalpa hnena ngaihdam dil mawlh mawlh tur kan ni.