Ticktock

Thursday, January 17, 2008

Ka Pi leh Pu



Ka pi leh pu te hi mi pi leh pu te ang em ni lo mahse, an inneih kum 60-na champha lawm thei a an min la dampui avang hian an chanchin tlem azawng ti laiah hian kan tarlang ang e.

Upa K. Liankunga Chanchin Tlangpui

Upa K. Liankunga hi Upa Challianthanga (Bawka) (Fam) leh Pi Kawli (Fam) te fapa, unau sawm piang zinga palina niin, ni September ni 8, 1927-ah Thiak khuaah a piang a. A ute pahnih hi an tet lain an boral avangin fa u niin a pa chhawmdawltu ber a ni a. Chhungkaw rethei tak kara lo piangin fa u chhawr a nih bawk avangin lehkha a zir thui thei lova, pawl thum chu a zir thleng ve a, mahse exam lovin a chawlhsan ta a ni. Hun engemawchen kut hnathawka chhungkua a enkawl hnuin, sipai a tan te a chak ve em em thin a. Mahse, a pa-in, “Nang sipaia i tan chuan tunge i naute enkawl ang” a ti a, a tang leh ta lova. Amah hian lehkha zir thui thei lo mahse a naute tan rual awtin lehkha a zir tir a. A nupui Pi Zakungi nen nu leh pa thachhang dawlin an naute pawh an enkawl chho a ni. Tichuan an unau hi mipa pali leh hmeichhia pali an puitling a, tunah hian mipa pahnih leh hmeichhia pathum an la dam a ni. An unau hi unau inhmangaih tak leh tangho a engkim ti tlang thin an ni a, tun thleng hian thil tikhawm a lungrual taka inpui tawn dial dial zel an ni.

Kum 1948, January ni 2-ah Pi Zakungi nen Sialsuk Presbyterian Kohhran Biak Inah Pastor Nikhama kutah an innei a. Fa sawmpakhat, mipa pali leh hmeichhia pasarih an hring a, an fa u-ber Thangliana chuan kum 1979 khan accident-in a boral san tawh a. A fa-te ho hian nupui pasal neiin inhrang an chang vek tawh a ni. Upa K. Liankunga te nupa hian fa sawmpakhat a hrin bakah hian tu leh tuchhawng sawmsarih pakhat a nei a. Heng a tu-te zinga panga chuan an boral san tawh a, tunah hian a thiannu Pi Zakungi nen hian Kulikawn vengah an cheng mek a ni.

Upa K. Liankunga hi tlangval a nih lai atanga sakhuana lamah pawh nu leh pa hnung zui zelin Kohhranah rawngbawlin kum 1942-ah Kohhran full member-ah a lut a, a tlangval lai atangin naupang Sande Sikul zirtirtu nihna a chelh a, kum 2001 khan kum 53 zet a thawh hnuin Jubilee Award a dawng a, vawiin thleng hian Sande Sikul zirtirtu hna a la thawk chhunzawm zel a ni. Tin, Tual Upa-ah term hnih thlan a nih hnuin Presbytery Member-ah kum 1971-ah khan Chhimphei Presbytery chuan Kulikawn Biak In-ah Thiak Upa atan a nem nghet a. Pastor Bial Chairman leh Treasurer te ni tawhin Chhimphei Presbytery-ah 1987-ah Moderator a ni a. Tin, Synod-ah Pastoral Committee leh Financial Committee member te a lo ni tawh bawk. Tichuan Lungsai khuaah pem lehin kum 1998 khan Lungsai Kohhranah Upa atan thlan nawn leh a ni a, Bible Society-ah Patron member a ni bawk. Kum 2006-ah Kulikawn Hmunthar Venga an lo pem hnu pawhin Kohhranah a phak ang tawkin rawng a la bawl zel a ni. (Ka pu te hi pem tih lemah Huanah (Farm) an khawsa a, chuta tanga Kohhran hnai ber Lungsai lamah a lawi ta niin ka hria)

Upa K. Liankunga hi eizawnna lamah pawh pa duailo tak a ni a, lehkha thiam lo mahse rualel leh taima, mi tumruh tak a nih avangin tunah hian hausa lo mahse pa intodelh tak a ni. Kum 26 zet bawng khalhin a sum dawng a, chumi hnuah eizawnna ngelnghet dinin bul a tan a. Kan Mizo eizawnna pangngai kum tina lo neih duh tawk lovin eizawnna ngelnghet huan siamin bul a tan a. Sateek rama Damdiai Farm hi kum 1971 favangah khan a siam tan a, thlahte zel tana tha tura ngaiin hmun fianrial leh thenawm hmuh phak loh pawh pawisa lovin bul a lo tan ta a ni. Mizo lo neih dan kum tin a hmun dang a insawn kual a thlam thar sak reng mai hi tha lo a ti a, “Hmun khata kan kumtin hnathawh a tlinkhawm loh chuan mi taima nih a har” a ti thin a. Huan nghet neih sawimawiin ram leh hnam tana a tha turah a ngai a, hetiang lam hawi Seminar-ah pawh tel peih tak leh Paper te pawh buatsaih a thahnem ngai tak a ni a. Vawi tam tak All India Radio Aizawlah te pawh thu a sawi tawh thin a, Doordarshan Mizo Programme-ah te pawh amah an kawmna hi an lo tichhuak tawh thin a ni. A eizawnna kut hnathawha a hlawhtlin hriatpui nan chawimawna heng - Nehru’s Centenary Award leh Huan nei tha lawmman te pawh a lo dawng tawh a ni. Kum 2006, September ni 1-ah tuna an chenna Kulikawnah lo pem pheiin, hmuh theih khawpin an chenna bul hnaiah huan tha tak a siam leh tawh a. A kum ngaihtuahin a viak a la tha in pa taima a ni tih a lang chiang hle a ni. (Aizawlah hian In hmun hrang hrangah a nei ve bawk tak nangin Kulikawn Hunthar veng sir lamah mi chim phak vak loh huan siamna remchang hi a thlang zawk hlauh. Vaivakawna a in khu khulai vengah chuan RCC Building hmasa pawla an sawi a ni.)



Thil thenkhat amaha bet tlatte:

1. Zuk leh hmuam, ruihtheih thil ti miah lo a ni.
2. Nitina inbual fai duh mi a ni.
3. Radio ngaithla peih tak, chanchin thar leh thlirvelna phei chu hmaih ngai lo a ni.
4. Pathian thu leh taimakna inzawm tlata ngaitu a ni.
5. Kohhran khawmpui pawimawh leh Committee a kal zel thin a ni.
6. Lehkha nitin chhiar a, lehkha chhiarna pindan (library) nei hrang mi a ni.
7. Thei lam chi hi chaw pakhat a ni ti a ei tel ziah thin a ni.
8. Mihlim thlarau nuphut chi hi a ngai thei lo hle.
9. Engmah renloh nei lova, engmah tlakchham neih duh lo mi a ni.
10. Thiamna hi hman tangkai loh chuan thiamna a tling lo a ti thin.

Pi Zakungi hi Pu Darkhuma (Tuikuala) (Fam) leh Pi Thangchhungi (Fam) te fa pasarih zinga a up ber dawttu niin kum 1931-ah Thiak khuaah a piang a. Lehkha zir thui lovin pawl thum a zir zo a, a chawlhsan ta a. Kum 1948 January ni 2-ah Pu K. Liankunga nen innnei in, fa sawmpakhat, mipa pali leh hmeichhia pasarih an nei a.

Pi Zakungi hi nu taima, mi ringawm leh chhel tak, pasalte hnung zui peih reng a ni. Pasalte hming thatna tura kaiza veng tlattu a ni. Chhungkaw enkawl kawngah pawh phun nawi ngai lo mi a ni. Thenawm pawh nei lo a chang phei chuan mahni chauh pawh a huan nghak a, “Ka tu leh fate tan” ti a hrehawm leh khawhar pawh sawi lova hna thawkin a thatlai hun zawng zawng hmang ralin vawiin ni thleng hian a theih ang tawk a tu leh fate tana la inpe reng a ni. (Ka hriat sual loh chuan ka pute farm atanga khaw hnai ber hi km 5 vel a niin ka hria a ai pawn a hla mai thei, ka pu hi a inkhawm peih zak zak tho)

Tin, a fate hi a hmangaih em em a, sakhuana leh mihring lamah pawh kaihhruai tum em em mi a ni. Nu zaidam tak, fate tana inhmang zo nu a ni. Nu inngaitlawm, inchhung luahlum zo, a pasal a nihna tur anga a nih theihnan a phen a lo tang tlat mi a ni. Kum sawmruk an inneih chhung hian vawi khatmah lungawi lo ‘tlan’ kan tih ang hian ama nu leh pate In a la thleng ngai lo a ni.

Pi Zakungi hi a theih ang tawk tawka Kohhrana inhmang thin a ni a. A nulat chhungin Sande Sikul zirtirtu ni ngar ngar thin a. Tin, Thiak Kohhran Hmeichhe Committee member te, Pastor Bial Kohhran Hmeichhe Committee member te pawh a lo ni tawh bawk. Lungsai Kohhrana an pem hnuin Kohhran Hmeichhe Committee member ni zui zelin, Bible Society-ah pawh Life Member a ni bawk. A mit leh ke te chak vak tawh lo mahse Kulikawn venga an lo pem hnu pawh hian a chak vak lo chungin a theih hram chuan inkhawm duh tlat mi a ni. Kut hnathaw leh Pathian rawngbawl hi a hlimna ber a ni.