Ka ngaisang chuang si lo!

- R. LalZarmawia
Source: Vanglaini

Zu a rui a, a tawng bual bual a; chuti chung chuan thu tha tak tak a chhak chhuak zut zut a. Pathian thu, Bible bung leh chang nalh tak tak a la chhuak a, Eden huan atangin a luhchhuak a, hringnunah a tawp a; lei leh Van a suihzawm a... chutih pah chuan a uak leh thawt thawt thin a, Pathian thu leh sorkar chungchangte hi a sawi kur duah a, a meng pui pui a, ka ngaihsan phah chuang si lo!

Kohhran upa a ni a, pa chengvawng tak angin a lang a, sorkar hna a thawk bawk. A fanu leh fapa chanchin sawi tlak a neih ka hre lo va, sawi tlak loh chanchin nei fa a neih leh neih loh hre lo mah ila, amah ka ngaihdan chu a danglam chuang lo. Sorkar atangin thla tin hlawh a la a, a hlawh lakna pisa atangin chhunah te hian khawi lai lai emawahte a tei kual zur zut a. A chang leh, khaw hla takah gospel camping leh crusade nei turte hian a thang bo vang vang a, zaikhawm tuizia leh Pathian hnathawh ropuizia te hi a rawn sawi phul hlut thin. Mahse, thla khat emaw, a aia tam emaw sorkar hna a tlanbosan chang a, khawi lai lai emawa thlarau a buaipui chiam chiam chung pawh chuan, amah bera chuan harhna a chan awm pawh ka hre lo va, a thawh loh hlawh hi vawi engemawzah sorkar atangin a la tawh a, thiam loh a inchantir chuang lo.

A ni tin eizawnna tlansanin, pawihawi leh chhuanlam tinreng nen pisa a chhuahsan a, khawi hmunah emaw thil tha a va ti vel vei thin a; mahse ama hnaa a rinawm miau loh avangin, eiru langsarte nena ka hmuh dan a thuhmun reng a, mi hmuhah mi tha tak angin lang mah se, ka ngaisang chuang lo!

Zu pawh in lo, Kohhran pawh bel chuang lo a ni a. Mite'na kan hmuh dan chu mi tha pangngai leh nun tluangtlam a ni. A chang chuan politics fuh tawh lohzia a thupui a, a chang leh a tute nun emaw a kham thu a sawi ve leh zauh thin. Tu pawi mah a sawi lo tih chu amah leh amah paw'n a inhrechiang viau a, zul leh hmuam, ruihtheih thila a fihlim avang chuan mi dang ngaitheih lohna lian ang reng tak hi a nei a; a lang a pauin chu a ngaihdan chu tilang lem lo mah se, a ngaihtheih zawng leh zawng loh chu a hriat tho. Ram nun kal sual hi a vei a, her rem a duh a, chuti chung chuan a ngawi mai a. Chet chhuah a tum lo va, mite chu khelmual chhunga inkhel lai ang mai hian a sir atangin a thlir ni mai hian a hriat. Chuti chung chuan mi nih dan leh awm dan dik lo chu siam tha duh angin a insawi fo a, a chutih fo avang chuan ka ngaisang chuang si lo!

A thawh fuh tuk chang chuan Kohhran tan a inpe em em a, a ring pawh a rawlh thuk hma thin hle a, mi pangngai tak a nih avang leh, Kohhran rawngbawlnaahte chuan mihring indaih lai tak tak awm chuang hek lo le, a kul a taiah an hmang thuai thin. Mahse engemaw tihpui nikhua a lo thleng a, necktie leh kawrchung ha chung paw'n Kohhran lam serh leh sang chu a pawisa leh chuang hran lo va, mi hriat loh leh mi hriat ngei paw'n zu no dawm a hreh chuang lo.

A tul angin a thle tawn mai a, tul a tih hunah a inkhawm a; tul a tih hunah ngaihzawng kuah chungin ruihhlo a kawm leh mai. Style tih tawngkam hi a ngaisang em em a, a tun lai thei ang bera a hriatin nunchan hi a hmang a, thil tak tak hriat tum chuang si lo hian ama phak tawkah ngaihdan fahrah ve te hi a nei a, mawl nihte chu midang chanah a dah hlauh thung.

Tun lai thiamna leh finna zawng lo vin, ama'n nawmchenna leh a nun hlimna tawk nia a hriat, phuahchawp leh tlachawp bungrua, nun leh thlarauah a inhnangfak a, amah aia hnuai zawk hreta a hriatte chu zahpahna a nei ngai hlek lo. Tuemaw ni ve riau hian a inhria a, engemaw ti ve thei riau hian a inhria a; mahse tu'nge a nih ka hriat chian miau avangin ka ngaisang chuang si lo!

Sorkarah mi pawimawh a ni a, sorkar thil tihte a sawi kur zut a, sorkar tih tur niawm taka ngaih, a tih leh tak lohte chu dawt leh chhuanlam hmangin a pha kual leh zut zut a. Sorkarna chu hlawhtlingpui hla anga a insawi laiin, a enkawl mipuite chu an tlaran tial tial a, a zak chuang hlei lo va! Mipui chanvo hi amah leh a chhungte chanvo tura ngai tawk vela ram hmangaih der thiam a ni a, eiruk leh thamna tih ang rengte chu Biak Ina inhlan tur pawh ni se, a pawisa chuang lo vang.

A kalna leh thlenna chin apiangah thawm a nei a, Pathian thute hi a sawi ri ve khauh khauh a, a zawm loh vangin mi tam takin harsatna leh buaina, thihna thlengin an tawh phah tihte a ngaihtuah pha lo. Fing a intih vena laite chu a mawlzia pholanna a ni a, sum mitchawngkawr nena ram leh hnam hi a en tlat avangin, thil tha a tih thu tlangaupui piap piap mah se, ka ngaihsan phah chuang der si lo!