Khawhar in riak/riah

Ni 17 Sept. 2007 zan dar 8:30 velah ka u te computer ka siam laiin ka phone a rawn ri ral ral a, Airtel sumdawnna ni dawn hi ti rilru chungin kan la a. A lo ni hauh lo! Zualko a lo ni zawk a. Kan chhungte zokhua lama mi, thim hlim dar 7 velah a boral a, a tuk chhun dar 12:00-ah vui a ni tur thu ka dawng a.

Rilru a vak a ka computer siam lai chu rilruah a awm thei tawh meuh lo. A fapa naupang ber 3rd Bn MAP-a khela (football player) ka rilruah a lang hmasa ber a, a te ber tih takah a nu a ngaih thin ziate ka chhut a. A nu thihna a tuar dan turzia chu ka hriatthiam pui rualin ka tawngkam thiamna hian a hrilfiah thiam lo tawp.

Zana phei nghal kan ngaihtuah deuh a, kawng chhiat ziate ngaihtuahin kal chiah ka ruat lova. Hrilh ngai nia ka hriatte kan hrilh kual hnu chuan kawng chinchang zawt turin ka nau ka phone a. Anni chuan bike-in a hma ni lawka a kal thu a sawi a. A tuka bike a kalzai chu ka rel ve ta a.

Dar 10:30-ah Muallungthu lam pan chuan ka thianpa nen kan inkhalh chhuak ta a. Ngaizel kan thleng dek dek a, footpath lamah bike chawi kai a a ngai nghal a. Saikhamakawnah pheite chu tuihawk leh chirh hlir chirh hlir! Vawk pawh a inbual duh lovang. Melthum kan pelh hnuah metalled road kan zawh a, lawm a rei lo ngei mai, km 1 pawh min daih lo. 'Chhimphei MZP ho hi an thawm a la zawi a nih hi, chhimphei hi a khaw nawtin thawhchhuah awm' tia insawh nghar nghar chung chuan kan thleng phei ve ta. Vui nan te chu sawi loh, kan thlen chuan thlan kal pawh an haw fai vek tawh, a vur pawh an vur zo vek tawh. Kan kawng teh hrep vang. Bike chuan tuar tak a ni, haw veleh major repair tir a ngai ngei ang. Ka thianpa bike a ni si, inthlahrun chu na duh tak a ni, sawi hian a siak lo. Haw leh lam chu huphurhawm tak a ni.

Chutia kan thleng chu ruang pawh kan nang si lova, haw leh mai ka rilruk a, ka tum angin thil a kal lo. Chhum a rawn thim mup mup a ruah a sur ringawt. Kawng a chiau zual ang, lei min te pawh a awm mai thei an tih si avangin riak tur chuan inbuatsaih a ngai ta si a, kan riak poh a niang chu.

Dar 5:30 velah hian nu leh pa inleng an nei tan a, titi lem lovin zai an tan zui nghal mai a. Dar 8:00 rik hmain nu leh pa ho chu an haw leh mai a, thalai ho erawh a hma zan tlaivar e ti lovin dar 9:30 velah an bang fel chauh a. Ban rualin khawhar in riak tur an rawn in pu lut tan a, kei pawh tlangvalte a hminga ka la nih ve avangin an zinga riah zai chu ka thianpa nen chuan kan rel ta a. Mutna kan han siam fel a, inriak lut tlai pakhat mah awm lovin an kim thap nghal a mai. Val upain tawite tawngtaina hun a hmang a, kan mu zui nghal a. Inriak zat hi ka chiang chiah lo nangin inpui lamah keimah tiamin mi 25 kan riak a. Hman lai Mizo in sak a choka leh inpui hrang a nih avangin choka lamah riak an awm bawk a. Choka lama riak hi tlangval kan bula mu sawi danin 13 an ni awm e. Kan zavai chuan mi 38 kan riak a nih chu. Khawhar in ka ri ve tawhnaah chuan kan la tam ber tum a ni.

Aizawl veng pakhatah chuan khawhar in riah hi tihtawp a ni tawh a, chanchinbu lam leh titi lamah pawh inhnialna a siam a nih kha. Veng dang khawhar inriah ti tawp dang erawh ka hre lo. Mizote hi khawhar chhungte riahpui hnam kan ni a. Mitthi an awm in nula tlangval mai ni lo, nu leh pa thlengin kan chein mitthi chhungte kan pui a, kan hnem thin a ni. Chung kan hmanruaah chuan khawhar inriah hi a tel a, tlangvalte tihtur a ni. Hman lai chuan tui chawi te, buh den te, thing phurh te leh hna dang tam tak nitina tih ngei ngei ngai chi a awm a. Heng tulah te hian inriak tlangvalten mitthi chhungte an pui thin a ni.

Tun laiah erawh heng tul kan tih tam takte hi awlsam zawka tih theih a lo ni ta a, a bik takin khawpui hrang hrangah te chuan inpuih ngai tawh lo tluk a ni. Chuvang chuan Aizawl veng pakhatin khawhar inriak a ti tawp hi awm lo tihna ka nei lem lo a ni. Aizawl angah ngat phei chuan tleirawl rualten khawhar in riah hi remchanga hmangin thil sual tihnan a hmang tawk pawh an awm fo. Kei ngei pawn heng tleirawl rual han khak/zilh hi ka nei ve thin. Zu rui/nam chunga khawhar in rawn riak an awm thin a, meizial zuk ruk chingte an awm bawk. Khawhar inleng hawna thuthleng rem fel a, hmunte phiat a, thil han ti fel zung zung tur an awm lova. Zingah nise chuti bawk. Khawhar chhungte tan hauh chi an ni lo, khawhar hnemtu turte hian tuarna an rawn belhchah zawkna lai a awm ngei ang.

Tunah chuan kan lo upa ve ta a, mahni thenawm hnai leh thian tha, ngamtlak leh laina te an nih ngawt loh chuan ka riak ta lem lo. Ka riah pawhin YMA rawtna angin zan 3 bak ka riak ngai lo. Enge i ngaih ve dan?