Ticktock

Friday, November 30, 2007

New Job

"Sawrkar hna hi chu a hlawh tam lem lo mahse a survive theih, security a tha" an ti thin. He thu hi kei pawhin ka ring a, kohhran thurin aia ka hriat chian a ni. Sawrkar hna chhete kan thawk a, hlawh tam lem lo mahse kan dam loh te hian kan chawi ang ang hi kan bill let leh vek a, a zavai ni lo mahse hmun thuma thena hmun hnih te hi chu a ni tlangpui. Zin nikhua te hian TA/DA a bill theih a, tha ve deuh a sin. Private-ah thawk ila hlawh chu kan hlawh teuh mai thei. Amaherawhchu zan khat mit chhin lo tawk palh ta ila engtin nge niang?

"Mihringte chu sum duh lo kan awm lo" tih pawh hi a dik ka ti khawp mai. Amaherawhchu "Rs.1/- a pawh a meng kar" an tih ang em em chu ni lovin ka inhre ve. Hlawh tha zawk umin hna hrang hrangah kan kual a, MR ten, Contract ten, mi aiawh ten kan kual lawp lawp a, hlawh tha a piang kan bawh a. A tawpah hna nghet ka neih
ta nge nge a.

"Tumna a san chuan tlakna pawh a sang" tih hi ka vawng lem lo nangin exam peih ta hrim hrim chu vanneih hun a awm hi ka ring tlat thin. Exam te hi chu awlsam te in ka tling tla a, pratical a awm pawn ka harsat lem lo. Interview mawlh mai hi a ni!!!! Aizawl mihlun kan ni lo bawk a, hmelhriat te hi kan han nei chau khawp a. Min interview tu turte hi chu an hmingte chu ka hre khawp, anmahnin min hriat ve loh hi a pawi ber zawk chu a ni. Pawl 10 kan zawh hlimte kha chuan interview te hi khur chungin kan hmachhawn thin kha a nia, tunah zawng ka tapchhak thian kawm ve thei tawh. Hrethiam mai em? Ka interview hnem tawh vang te pawh a niang.

"Dikna chu a tlo" an ti, a fei khawp mai. Thiam vangin (ka chapo lo a nia) sorkarah ka lut a, pu te pawn min duhsak a, a buai pawh ka buai a, a hah lah ka hah. Ban daih te ka chak thin, mahse bang ila, enge ka thawh ang, chem hum dawn ila, mit a monitor en a kuta keyboard hmeta eizawng thin tih takah ka kut a no bawk si, ka nghei reng ang. Chutia mi tirhkah nih reng chu ka lo peih awzawng lo mai, ka chungah hian kei ai lal hi thlasik sava nilum ai, thirhruia fu zat zet an awm a. Kal na a piangah 'sir sir' tih tur an awm chuan kan te chem chem mai a. Ka duh khawp lo.

"Ka tum nge ruh,saruh" upaten an ti thin. Upat hnulamah kan ti tha ve leh a, exam theih apiang kan exam a. Ka hlawhtliang chuang lo. Saruh nge nge a lo ruh deuh e. Mizoram University-a ka interview dawn tum hian ka chhungte an tlawmngai ve deuh tawh a, "chumi khami chu kan hre ve a lawm" an ti a, ka duh bau lo. Ka fit lohnaah chuan thawh ka tum lo bur. Keimahah chuan tling lo langsar ka ni.

"Ka dil loh zawk malsawmna" tih hla hi a thu a tha a, sa awm tak ka ni, ka thiam chhuak lo hlauh! A thunawn erawh ka sa ret ret thei. Office pakhatin ka dil hauh lovin min rawn ko ve hlauh mai a, ka han exam ve ta lawm. Beisei nei hauh lovin practical te, written te, interview te ka hmachhawn a, vanneihthlak takin result chhuakah chuan ka tling hlauh mai a, ka va han lawm tak em.

"Buaina lo kiang la" tih hla pawh a awmin ka hria. Vawi leh khatah ka buaina a kiang mai dawn emaw ka tia, a kiang hauh lo. Semi-govt ang chi, autonomous body hi an lo nia, sawrkar hnathawk pangngai ang lo deuh hi a lo ni leh si a, ka join ang nge join lovang tih avangin mut hmunah rilru a kal thui duh khawp mai. Nimahsela kei aia fing ni a ka hriatte ka rawn kual hnuah zawm chu ka rel thlu ta nge nge a. Ni 28th Nov. 2007-ah ka hna thar chu ka zawm ta a.

"Ban a har lo, a luh hi ni har" an ti thin, a dik tho mai. Banna te kan thehlut a, ni 3 vel ka buai a, a tawp a tawpah chuan min release thei hram a. Proper channel ni hek lo, ka service engmah lah ka chhawm thei der lo va, a uihawm duh khawp mai.

"Sir" tih tur hi ka ngah thin khawp a ka hna hluiah khan. Ka hnatharah Peon 1 in "Sir" min ti mai chuh!!!! Ka bengchhe ri emaw te ka ti vel. Mi ko a ni tih pawh ka ring pha lo lutuk khan ngaihsak na chang pawh ka hre lo a. A vawi 2 na-ah erawh keimah ngei a ni tih ka chiang. A nuam ngei mai, Rs.100/- ka pe tep a ni. Mahsela "sir" min ti tawh suh ka ti daih. Ka zak tlat! Working environment a chhiat phah em lovang chu.

"A tawpah chuan" happy ending a awm thin. Tichuan, ka hna thar chu ka zawm fel a, lal em em lo mah ila, a nuam ve tho. Heti laiah erawh tawp mai ka la tum lo thung. Central hnuaia thawh hi ka la tum ta reng a, la exam chhoh zel hi ka tum a ni.

Thawh tur min pe tu, thawk thei a hriselna tha min petu Pathian ropui ber rawh se. Ani chuan kan dil loh thlengin min pe a, mal min sawm si thin.

Wednesday, November 7, 2007

A Concert for LIFE - Closed

Thian hovina kan thianpa tanpuina atana buatsaih ‘A Concert for LIFE’ (in aid of Sanglura) chu tluang takin kan zo thei a, a lawmawm hle. He concert atanga kan hmuhchhuah Rs.70,000/- chu Zosanglura pa hnenah Nov. ni 5, 2007 zan khan hlan a ni a, a chhungte pawh an lawm thiam hle.

Zosanglura hi Oct. ni 22, 2006 khan vanduaithlak takin bike-in a su a, chuta tang chuan harhchhuah mumal a nei lo ta reng a. CMRI, Kolkata leh Aizawl damdawi in hrang hrangahte enkawl a ni tawh a ni. Kum khatna cham a thlen hma deuh atang khan fiah lo ruai hian sawi rawh tih te hi a rawn sawi thei ta a, chhungkhat laina, thenrual thate kan lawm hle a ni. Nizanah fiamthuin ka 'AOE ka va khelhsan ang che aw' ka tia, nui vur vur chungin 'Aih' a rawn ti chu(h) rilru a khawih duh khawp mai. Beiseina sang tak min petu a ni.

A tirin Mission Veng YMA North Branch-in Sanglura tanpuina’n concert siam nise tiin a rel a. Nimahsela, a pain ‘tlawmngaiin mi dangte pawh tanpui ngai an tam ang a, an la awm zel bawk ang a, tih theih vek si loh chuan hruaitute demna te a awm palh ang e. A then a ruah sur, a then a ni sa te an ti palh ang e’ a tih avangin YMA lam pawn ni e tiin a thulh ta ni. Hetia a rem tak lohah chuan thianzaho inrawnkhawmin ‘mi kan tanpui turte ka lo tanpui che u kan ti hmasa ngai lo ve’ tiin Sanglura chhungte pawh hriatpui lem lohvin he concert neihzai kan rel ta a ni. A tuate pawn buaina kan neih neuh neuh avangin chanpualte kan han insem a, pawl a tam tawh lutuk tihte chu hre tho mah ila nihna insem a lo ngai a, OB-te chu kan awm ve leh ta tho va.

Thil buaithlak tam tak kan pal tlang a, sponsor han zawng dawn ila, mimal thil mimal tanpuina tur a ni bawk s! Tax exemption-ah ni se charity a nih dan hi mimal hming a ni leh bawk si, a theih leh theih loh tur pawh kan hre lo va, kan zawh apiangin ‘ka la hre ngai lo, kan la ti ngai lo’ tih chu min chhanna a ni. ‘In pawisa khawn chu pe nghal ula ni mai lawm’ ti pawl an lo awm bawk a, a thenin ‘Amah hi chu ka tanpui duh mahse, organize tute erawh ka tanpui duh lo’ an lo ti bawk a, ticket zawrhah pawh kan buai phah a, amaherawh chu thudik erawh a ding chang a khiti zat khi kan senso kan paih hnu pawn kan hmuchhuak a ni. Taxation lam danah 75% charity-ah thehluh a ngaih laiin 100% kan thehlut/hlan thei hi min lawmpui ve hlawm kan ring. Mimal hlawpuina tura he concert hi buatsaih kan ni lo va, hlawk a hnekin kan phone bill te a pung tual tual a, motor leh bike nei ho oil a hek a, kan inhmuhkhawmna te chhungkaw bawnghnute, thingpuife, etc. tam tak a hek a, a tuate pawh kan tha leh zung, hun hlu tak te a hek a ni.

Vanneihthlak takin kan buaina chu kan hmachhawn a, kan vai kiang ve zel bawk a. Artist a free a zai thei tur kan zawng a, RCh-a of Lawma Enfield vangin zaithiam tha ber ber tun lai Gospel band lar tak takten hreh miah lovin hlawh nei lovin min zai sak a, a va lawmawm em! Bul tan nan thian thate bawkin pawisa an rawn thawh a, a hming vuah tur kan hre leh si lo va ‘sponsor’ hming put tirin kan kal leh ta tho va! Heng mite chungah hian kan lawm tak zet a ni - Henry of Zawlbuk Real Estate, Zosangi of Hauva & Sons, OP-a of Biakliana & Sons, Madina of MD Enterprise, Pu V-a of Car Clinic leh Health Food. Sound System-ah u Para ka va bia a, ani’n rawngbawlnaah ngaiin a man tlawm bawkin min lo hman tir leh a. Ticket, poster leh banner print a man chanve-in MCh-a leh Joe (Jerry Inc.)-te vangin kan ti thei leh a. Publicity-te a lo ngai ve leh a, hming sawi duh lo viau mahse Atha-a & Zira of Vanglaini/Zonet te, Saka of LPS te, Zoa Tlau & Fela Fanai of Aizawl/Evening Post & Zalen te, Malsawma of Tawrhbawm te, Ngura of Zozam Times te an chungah kan lawm hle a ni. Thian neih hi a lo hlu ngei mai! Ads mai duhtawk lo va thahnem ngai taka min ziah sak avanga he concert hi hlawhtling a ni.

Lawmthu hi sawi kim a har a, lawmthu lo pawh sawi tur a tam mai. Kan in sawi kim seng lo palh a nih pawn lo hrethiam se Security zawng zawng te, Reception leh Ushering min buaipuitu te, ticket kan dahna dawr hrang hrang te leh thahnem ngaia mimala min zawrhsaktu te, Bake House Tuikhuahtlang te, an zavai chungah kan lawm tak zet a ni. Sawi hmaih miah loh tur, a pawimawh ber chu ticket min lei saktute in ni. En lo turten ticket in han lei te kha ropui kan ti. Kan lawm e.

Tuesday, October 30, 2007

Thursday, October 18, 2007

Dream Myself Awake

I've been waiting
I've been aching
Now you're fading out of reach
I was angry
Now I'm sorry
Have mercy over me

Because a life without love would only be a living hell
I don't wanna be alone and I don't want no one else
So I dream myself awake
And I tear myself to pieces
I've had more than I can take
But I just don't see me leaving
Do me wrong
Do me right
Do me anyway you want tonight
I can't get enough of you baby
I can't get enough of you baby

I remember back when we were babies
Young crazies
And you made my soul complete

Yeah you saved me
Now you hate me
And our love won't doubt on me

Because life without love is gonna be a living hell
I don't wanna be alone and I don't want no one else
So I dream myself awake
And I tear myself to pieces
I've had more than I can take
But I just don't see me leaving
Do me wrong
Do me right
Do me anyway you want tonight
I can't get enough of you baby

Friday, October 12, 2007

Ka ngaisang chuang si lo!

- R. LalZarmawia
Source: Vanglaini

Zu a rui a, a tawng bual bual a; chuti chung chuan thu tha tak tak a chhak chhuak zut zut a. Pathian thu, Bible bung leh chang nalh tak tak a la chhuak a, Eden huan atangin a luhchhuak a, hringnunah a tawp a; lei leh Van a suihzawm a... chutih pah chuan a uak leh thawt thawt thin a, Pathian thu leh sorkar chungchangte hi a sawi kur duah a, a meng pui pui a, ka ngaihsan phah chuang si lo!

Kohhran upa a ni a, pa chengvawng tak angin a lang a, sorkar hna a thawk bawk. A fanu leh fapa chanchin sawi tlak a neih ka hre lo va, sawi tlak loh chanchin nei fa a neih leh neih loh hre lo mah ila, amah ka ngaihdan chu a danglam chuang lo. Sorkar atangin thla tin hlawh a la a, a hlawh lakna pisa atangin chhunah te hian khawi lai lai emawahte a tei kual zur zut a. A chang leh, khaw hla takah gospel camping leh crusade nei turte hian a thang bo vang vang a, zaikhawm tuizia leh Pathian hnathawh ropuizia te hi a rawn sawi phul hlut thin. Mahse, thla khat emaw, a aia tam emaw sorkar hna a tlanbosan chang a, khawi lai lai emawa thlarau a buaipui chiam chiam chung pawh chuan, amah bera chuan harhna a chan awm pawh ka hre lo va, a thawh loh hlawh hi vawi engemawzah sorkar atangin a la tawh a, thiam loh a inchantir chuang lo.

A ni tin eizawnna tlansanin, pawihawi leh chhuanlam tinreng nen pisa a chhuahsan a, khawi hmunah emaw thil tha a va ti vel vei thin a; mahse ama hnaa a rinawm miau loh avangin, eiru langsarte nena ka hmuh dan a thuhmun reng a, mi hmuhah mi tha tak angin lang mah se, ka ngaisang chuang lo!

Zu pawh in lo, Kohhran pawh bel chuang lo a ni a. Mite'na kan hmuh dan chu mi tha pangngai leh nun tluangtlam a ni. A chang chuan politics fuh tawh lohzia a thupui a, a chang leh a tute nun emaw a kham thu a sawi ve leh zauh thin. Tu pawi mah a sawi lo tih chu amah leh amah paw'n a inhrechiang viau a, zul leh hmuam, ruihtheih thila a fihlim avang chuan mi dang ngaitheih lohna lian ang reng tak hi a nei a; a lang a pauin chu a ngaihdan chu tilang lem lo mah se, a ngaihtheih zawng leh zawng loh chu a hriat tho. Ram nun kal sual hi a vei a, her rem a duh a, chuti chung chuan a ngawi mai a. Chet chhuah a tum lo va, mite chu khelmual chhunga inkhel lai ang mai hian a sir atangin a thlir ni mai hian a hriat. Chuti chung chuan mi nih dan leh awm dan dik lo chu siam tha duh angin a insawi fo a, a chutih fo avang chuan ka ngaisang chuang si lo!

A thawh fuh tuk chang chuan Kohhran tan a inpe em em a, a ring pawh a rawlh thuk hma thin hle a, mi pangngai tak a nih avang leh, Kohhran rawngbawlnaahte chuan mihring indaih lai tak tak awm chuang hek lo le, a kul a taiah an hmang thuai thin. Mahse engemaw tihpui nikhua a lo thleng a, necktie leh kawrchung ha chung paw'n Kohhran lam serh leh sang chu a pawisa leh chuang hran lo va, mi hriat loh leh mi hriat ngei paw'n zu no dawm a hreh chuang lo.

A tul angin a thle tawn mai a, tul a tih hunah a inkhawm a; tul a tih hunah ngaihzawng kuah chungin ruihhlo a kawm leh mai. Style tih tawngkam hi a ngaisang em em a, a tun lai thei ang bera a hriatin nunchan hi a hmang a, thil tak tak hriat tum chuang si lo hian ama phak tawkah ngaihdan fahrah ve te hi a nei a, mawl nihte chu midang chanah a dah hlauh thung.

Tun lai thiamna leh finna zawng lo vin, ama'n nawmchenna leh a nun hlimna tawk nia a hriat, phuahchawp leh tlachawp bungrua, nun leh thlarauah a inhnangfak a, amah aia hnuai zawk hreta a hriatte chu zahpahna a nei ngai hlek lo. Tuemaw ni ve riau hian a inhria a, engemaw ti ve thei riau hian a inhria a; mahse tu'nge a nih ka hriat chian miau avangin ka ngaisang chuang si lo!

Sorkarah mi pawimawh a ni a, sorkar thil tihte a sawi kur zut a, sorkar tih tur niawm taka ngaih, a tih leh tak lohte chu dawt leh chhuanlam hmangin a pha kual leh zut zut a. Sorkarna chu hlawhtlingpui hla anga a insawi laiin, a enkawl mipuite chu an tlaran tial tial a, a zak chuang hlei lo va! Mipui chanvo hi amah leh a chhungte chanvo tura ngai tawk vela ram hmangaih der thiam a ni a, eiruk leh thamna tih ang rengte chu Biak Ina inhlan tur pawh ni se, a pawisa chuang lo vang.

A kalna leh thlenna chin apiangah thawm a nei a, Pathian thute hi a sawi ri ve khauh khauh a, a zawm loh vangin mi tam takin harsatna leh buaina, thihna thlengin an tawh phah tihte a ngaihtuah pha lo. Fing a intih vena laite chu a mawlzia pholanna a ni a, sum mitchawngkawr nena ram leh hnam hi a en tlat avangin, thil tha a tih thu tlangaupui piap piap mah se, ka ngaihsan phah chuang der si lo!

Wednesday, October 10, 2007

I liam mai tur hi.....

Mizo mipa zinga zai thiam ka tih em em Joseph Zaihmingthanga chuan hla hlui rawn hrut lehin 'Ka Pa Hla Duhzualte' tih album a rawn siam a. Ka nghahhlelh ang ngeiin nghahfak a tling! Ka u Mami'n a lo lei a, tlai chaw eikhamah ka'n ngaithla ta ngei a. He hla 'I liam mai tur' hi a lo tel ve nawlh mai a. He hla hi Rosangliana hla a ni a. A kum ka hre tawh chiah lo nangin kum 1989-90 chho vel nitain ka hria Rosangliana 'Zorock' rawn lar vel kha. Ka ngaithla ve nasa hle thin. Tun thleng hian audio cassettee atanga record chhawn Mp3 fiah vak lo ka la nei a, ka la ngaithla fo.

He hla Josepha'n a rawn sak takah hian hmeichhe pakhat ka lung ti leng tu, Zorock hla ka ngaihthlak pui thin ngei kha min hriat chhuah tir a. Engtik niah emaw a lo hmuh ve tak mialin tiin heti laiah hian ka'n tarlang a ni.

Aw Hermawite, kan Zawlkhapui ti mawitu ber
Nang chauh i ni then leh rualte ti hlimtu ber
Kan ngai a che leng zawngte hian
Kan phallova che i liam mai tur hi zawng
Chung Pathian zarah dam takin aw mang tha le
Kan ui vawng vawng che i liam tur hi

Aw Hermawite, i liam mai tur hi ka dawnin aw
Tlei thei hianin ka mawi lo aw nang ngaih hi a na e
Kumpuisul lo vei tur hi kan nghakhlel e mai
Lo herchhuak leh thuai se aw
Lam ang leta i lo kir hun chuan
Aw nang nen hlim leh lawmin kan lengza leh ang

Aw Hermawite, i zirna kawngah hlawhtling fo la
Siamtu chung Pathian kha hre reng ang che
Keini pawn kan nghilh lawng che kan tawngtainaah
Kan hre reng fo vang che
Hei hi lo hre reng ang che i tuanna apiangah
Ram leh hnam tana rinawmna hi

Thursday, September 20, 2007

Khawhar in riak/riah

Ni 17 Sept. 2007 zan dar 8:30 velah ka u te computer ka siam laiin ka phone a rawn ri ral ral a, Airtel sumdawnna ni dawn hi ti rilru chungin kan la a. A lo ni hauh lo! Zualko a lo ni zawk a. Kan chhungte zokhua lama mi, thim hlim dar 7 velah a boral a, a tuk chhun dar 12:00-ah vui a ni tur thu ka dawng a.

Rilru a vak a ka computer siam lai chu rilruah a awm thei tawh meuh lo. A fapa naupang ber 3rd Bn MAP-a khela (football player) ka rilruah a lang hmasa ber a, a te ber tih takah a nu a ngaih thin ziate ka chhut a. A nu thihna a tuar dan turzia chu ka hriatthiam pui rualin ka tawngkam thiamna hian a hrilfiah thiam lo tawp.

Zana phei nghal kan ngaihtuah deuh a, kawng chhiat ziate ngaihtuahin kal chiah ka ruat lova. Hrilh ngai nia ka hriatte kan hrilh kual hnu chuan kawng chinchang zawt turin ka nau ka phone a. Anni chuan bike-in a hma ni lawka a kal thu a sawi a. A tuka bike a kalzai chu ka rel ve ta a.

Dar 10:30-ah Muallungthu lam pan chuan ka thianpa nen kan inkhalh chhuak ta a. Ngaizel kan thleng dek dek a, footpath lamah bike chawi kai a a ngai nghal a. Saikhamakawnah pheite chu tuihawk leh chirh hlir chirh hlir! Vawk pawh a inbual duh lovang. Melthum kan pelh hnuah metalled road kan zawh a, lawm a rei lo ngei mai, km 1 pawh min daih lo. 'Chhimphei MZP ho hi an thawm a la zawi a nih hi, chhimphei hi a khaw nawtin thawhchhuah awm' tia insawh nghar nghar chung chuan kan thleng phei ve ta. Vui nan te chu sawi loh, kan thlen chuan thlan kal pawh an haw fai vek tawh, a vur pawh an vur zo vek tawh. Kan kawng teh hrep vang. Bike chuan tuar tak a ni, haw veleh major repair tir a ngai ngei ang. Ka thianpa bike a ni si, inthlahrun chu na duh tak a ni, sawi hian a siak lo. Haw leh lam chu huphurhawm tak a ni.

Chutia kan thleng chu ruang pawh kan nang si lova, haw leh mai ka rilruk a, ka tum angin thil a kal lo. Chhum a rawn thim mup mup a ruah a sur ringawt. Kawng a chiau zual ang, lei min te pawh a awm mai thei an tih si avangin riak tur chuan inbuatsaih a ngai ta si a, kan riak poh a niang chu.

Dar 5:30 velah hian nu leh pa inleng an nei tan a, titi lem lovin zai an tan zui nghal mai a. Dar 8:00 rik hmain nu leh pa ho chu an haw leh mai a, thalai ho erawh a hma zan tlaivar e ti lovin dar 9:30 velah an bang fel chauh a. Ban rualin khawhar in riak tur an rawn in pu lut tan a, kei pawh tlangvalte a hminga ka la nih ve avangin an zinga riah zai chu ka thianpa nen chuan kan rel ta a. Mutna kan han siam fel a, inriak lut tlai pakhat mah awm lovin an kim thap nghal a mai. Val upain tawite tawngtaina hun a hmang a, kan mu zui nghal a. Inriak zat hi ka chiang chiah lo nangin inpui lamah keimah tiamin mi 25 kan riak a. Hman lai Mizo in sak a choka leh inpui hrang a nih avangin choka lamah riak an awm bawk a. Choka lama riak hi tlangval kan bula mu sawi danin 13 an ni awm e. Kan zavai chuan mi 38 kan riak a nih chu. Khawhar in ka ri ve tawhnaah chuan kan la tam ber tum a ni.

Aizawl veng pakhatah chuan khawhar in riah hi tihtawp a ni tawh a, chanchinbu lam leh titi lamah pawh inhnialna a siam a nih kha. Veng dang khawhar inriah ti tawp dang erawh ka hre lo. Mizote hi khawhar chhungte riahpui hnam kan ni a. Mitthi an awm in nula tlangval mai ni lo, nu leh pa thlengin kan chein mitthi chhungte kan pui a, kan hnem thin a ni. Chung kan hmanruaah chuan khawhar inriah hi a tel a, tlangvalte tihtur a ni. Hman lai chuan tui chawi te, buh den te, thing phurh te leh hna dang tam tak nitina tih ngei ngei ngai chi a awm a. Heng tulah te hian inriak tlangvalten mitthi chhungte an pui thin a ni.

Tun laiah erawh heng tul kan tih tam takte hi awlsam zawka tih theih a lo ni ta a, a bik takin khawpui hrang hrangah te chuan inpuih ngai tawh lo tluk a ni. Chuvang chuan Aizawl veng pakhatin khawhar inriak a ti tawp hi awm lo tihna ka nei lem lo a ni. Aizawl angah ngat phei chuan tleirawl rualten khawhar in riah hi remchanga hmangin thil sual tihnan a hmang tawk pawh an awm fo. Kei ngei pawn heng tleirawl rual han khak/zilh hi ka nei ve thin. Zu rui/nam chunga khawhar in rawn riak an awm thin a, meizial zuk ruk chingte an awm bawk. Khawhar inleng hawna thuthleng rem fel a, hmunte phiat a, thil han ti fel zung zung tur an awm lova. Zingah nise chuti bawk. Khawhar chhungte tan hauh chi an ni lo, khawhar hnemtu turte hian tuarna an rawn belhchah zawkna lai a awm ngei ang.

Tunah chuan kan lo upa ve ta a, mahni thenawm hnai leh thian tha, ngamtlak leh laina te an nih ngawt loh chuan ka riak ta lem lo. Ka riah pawhin YMA rawtna angin zan 3 bak ka riak ngai lo. Enge i ngaih ve dan?

Monday, September 10, 2007

Zan Thla Eng, Mizo Hla leh Kei

‘Thla-a lo tla rawh, matea'n a awrh nel nel ang che’ tia awm thlei chhoh hian Thla eng hi ka la lawm ta reng a, thla (photo) pawh hi ka lak sak fo. A changin lung a ti leng a, a changin min ti ngui a, a changin min ti hlim thin. Thla an bial phei hi chuan arsi tan hmun a awm lo a Thla ropui zia a lang chiang bik. Roliana Ralte chuan hla hialah lo chawiin, “Zan Lalnu” tihah chuan –

Chhak lenkawlah chhawrthla hai ang thovin,
Khuavel zan thim eng mawi rawn hawnin,
A her sang zel, aw, a eng mawi zel,
Hringfa leng tan thlir nin a har ngei.

Chhawrthlapui, aw, zan lalnu,
Malsawm tin phurtu ni la,
Hringfa leng tan ruahpui ang sur tir rawh.


tiin a phuah a. Zan Lalnu nihna he Thla hi a lo pe tawh a ni (Lalthakima album tharah a awm). Thla malzia hi kan zaithiamte hian an hmuchiang a niang. Zirsangzela’n a hla pakhat “Run Zau” tihah chuan ti hian a tarlang –


Thangvan si-ar zawngte lungruala leng ka thlirin
Rianghlei chung chhawrthlapui khian lung min len


tiin, arsite chu kawppui neia a hmuh laiin Thla erawh kawppui nei lovin a hmu a, a hmu khawhar hle a ni. Hei vang hian Thla nen hian in anna riau kan nei. Kawppui kan nei lovin mahni-in kan tei ruk ruk thin. Hla phuahtu pakhat (OPA?) pawn –


Chhawrthlapui pawh van zawlah
Mahriakte’n a eng riai e


tiin a lo au a, a mal thu a ti lang chiang khawpin ka hria. Roliana Ralte hian a hla dangah thung chuan –


Lungrun chhawrthlapui a lo eng leh ta,
Nau ang ka tah nan mai maw, a lo en


a ti leh lawi si. Mak erawh ka ti lem lo. He Thla eng hian lunglen khawhar hi a rawn keng tel ve tlatah ka ngai hmak.

Kan tleirawl chhoh khan tingtang ak chhuak a zai hi kan ching a. Kan lo lian deuh a nula in kan han chuangkai ngam ve a, an leikapui leh bathlar velah te kan zai chho ta zel a. Lunglen chhan em em la nei lo pawh kha Thla en zan hi chuan kan zai tui zual a, a khamawm loh hle thin.

Hman deuh khan ka thiante’n Bachelors’ Nite an siam a, leikapuiah em zai tawh lo mah ila, sap hovin ‘lawn’ an tihah hian mei kan chhem a kan zai a, Thla det tirh lam a nia a nuam khawp mai. Hetiang zan hi a tawn vang a ni ngei ang Zirsangzela chuan a hla “Hlim Zan” tihah chuan mawi takin a rawn tarlang –


Ningzu dawn chhuihthangval lenthiama
Perhkhuang tingtang leh chawmkhuang remin
A lam diai e selrun laichhuatah
Muvanlai tlang hrutin phar der der


A chang tawpah phei chuan a theihnghilh dawn lo tih a lang chiang hle –


Lampui changah tawn ni her le’ng a
Chutin kan chen zanin ngaih thute
Kan la hrilh leh dawn nia khaureian


A lunglen chi tan emaw lunglenna tur nei tan chuan khua a lo tlai lam deuh hi chuan lunglen hi a rawn in tan a, Thla an rawn chhuah phei hi chuan a zual thin. B. Malsawmtluangi (Spi) hla sak “Ka tuar thiam lo” tihah hian a lang chiang khawpin ka hria, hetiangin –


Zankhua a lo tlaiin suihlung a leng
Chhawrthlapui van zawl a kaiin a zual thin


Rebecca-i hla sak “Nghilh bik lawng che” tihah pawh hetiang hian kan hmu bawk –


Zan tlaiin kan run kai zawl a chhuak chhawrthla
A eng no riai suihlung min len si thinlaiah
Nang tawn loh vang hianin maw



Mahni chauhva awm hian lung a leng duh em em a, thianzahova awm hian a leng duh zual. Thiante inkawp han hmuh a hlim taka an nui hmuhte hian an thik awm. C. Zonunmawia’n a hla “Ka tan a tawk e” tih tan nan khan ti hian a rawn hmang a –


Zaleng dang zawngte chu hlimten an leng siau e
Kei erawh nang ngaiin tlai ni ka leng thin a


Rebecca-i pawn a hla sak “Ka phu lo che” tihah chuan –


Ka thlir ka Di lenna tlang, tah sawn an leng nui hiauvin
Min dawn ve maw a riangte hi, thinlaiah min vei ve maw


a lo ti ve bawk a. Thla en zan emaw bial zan emaw a duhberte nen a eng eng emaw lo ti dun tawh, biahthu di thleng pawha lo inhlan tawhte tan ngawt phei chuan a lunglen thlak ngei ang. Jenny hla sak “Her chhuak ve se” (Nono leh Remmuana) tihah chuan hetiang hian a rawn tarlang a –


Hmanah chhawrthla vankaiin kumtluangin aw kan tiam kha
Biahthu Di tinkim hril a lenlaipar kan tlan kha


Thla en zana thil thleng theihnghilh har ber a ni awm e. Spi hla sak “Ka dem lo che” tihah chuan heti hian a rawn sa a –


Thangvan zaua siar zawng leh chhawrthla a en chhung chuan
Nang nghilh zai reng hi banzai ka rel lawng e
Khuandim min chhawn thlengin ka nghilh mawlh lawng che
Tawrhhar mi u ka van ngai thin che em

A chang tawpna-ah phei chuan –


Van hnuai khuavelah hian nang ang lungdumtu
Tawng leh hian ka in ring thei mawlh si lo


a ti ta hial a. Thla a en chhunga a theihnghilh dawn si loh avangin midang tawn leh a inrin loh phah hial a ni.

Thla en zan (a bik takin arkaiden zan) hian kei hian Mizo Hlate ka hre chhuak a, chung hlate chuan ka nunhlui min hriatchhuah tir a, ka ngai a ni. Kumte a liam ang kan vanglai nun hi kan la ngai dawn chauh. I ni ve em?


Daduhi hlain i titawp mai teh ang -


Zankhua a lo tlai leh ang a
Engtin tuar ang i maw lunglen hi
Bawihte i zun ngai reng hian e
Tlai khua ka var leh dawn a sin

Friday, September 7, 2007

Child Labour


Child Labour is employment of children under age in certain occupation and processes.
I took picture of this because i am against some Child Labour (military use, prostitution, etc). But i am not sure whether he is helping his parents or family. But Wikipedia states "Child labor can be factory work, mining or quarrying, agriculture, helping in the parents' business, having one's own small business (for example selling food), or doing odd jobs." Sweepers are seen every morning, some work at midnight when the streets are free. I've come across several kids sweeping the street. Poor family often result in child labour. I don't blame every parents of such child doing such work. India is a developing country and Mizoram is among them. In Mizoram, helping parents/relatives is a good deed. Instead we always appreciate it.
So, upto which level/stage is Child Labour in Mizoram?

Friday, August 24, 2007

Why this blog?

Lets keep it short. Today, i scrolled through misual.com and found this. So, i tried to claim my old blog; i used to be a member of blogger.com. Like Lal, i have many emails and passwords which i can't keep track of it; i never use a password-software. My steps to claim was fruitless.

I'm sure it was around 2003-04 but i wouldn't argue as who was first. I just want to state that i am amongst them. I was one of the moderator at izawl.com and i used to have blog during those times. Yes, its from izawl.com that i met Ben, a great guy who used to sent me Linux stuffs and didn't expect his misual.com will become this big or say popular when he showed it to me in the developing stage. I think izawl.com members could recall the good old days of community forum. My Gmail account, i got it from one of the members. Unlike Lal, my memory is better than his :-). I met Lal from the good old #aizawlchat (DalNet) days. I used to admire him of his scritping skills.

Finally, there are many bloggers now and its a good way to advertise, express, in-touch etc. Hence, this new blog comes to live with a name that i wouldn't forget again (unless i suffer brain damaged).